Polisi Dar yaunda jopo la wapelelezi kuchunguza tuhuma za polisi kugawana Tsh.150m za tukio la ujambazi Kariakoo.

Kamanda wa Polisi Kanda Maalum Dar es Salaam Suleiman Kova (kushoto) akizungumza na vyombo vya habari jijini Dar es Salaam leo kuhusu hatua zilizochukuliwa na jeshi hilo kufuatia sakata la kutojulikana zilipo fedha taslimu shilingi milioni 150 zinazohusiana na tukio la ujambazi la kariakoo pia mafanikio ya msako unaoendelea na taarifa za matukio mengineyo ikiwemo vifo. Kulia ni Kamanda wa Polisi mkoa wa Kinondoni ACP Charles Kenyela.

Baadhi ya risasi 200 za bunduki ya SMG zilizokamatwa maeneo ya Kimara Mwisho baada ya watuhumiwa kutupa begi na kukimbia kwa pikipiki.

Video ya wimbo mpya wa Diamond Kesho hii hapa

Lulu abadilishiwa mashtaka

MSANII Elizabeth Michael, maarufu kama Lulu, ameepuka adhabu ya kunyongwa hadi kufa kwa tuhuma za kumuua msanii mwenzake, Steven Kanumba baada ya Mkurugenzi wa Mashtaka (DPP), kumbadilishia mashtaka, ambapo sasa anatuhumiwa kuua bila kukusudia.

Kutokana na mabadiliko hayo, Lulu ameepuka adhabu hiyo kwani hata kama atapatikana na hatia, adhabu yake ni kifungo cha maisha au kuachiwa huru.

Hii inatokana na kifungu cha 196 cha kanuni za adhabu ya kosa la kuua bila kukusudia, ambapo anayepatikana na hatia anaweza kuhukumiwa kifungo cha maisha, miaka kadhaa au kuachiwa huru.

Hata hivyo, baadhi ya wanasheria waliliambia gazeti hili kwamba uzoefu wa adhabu nyingi za kuua pasipo kukusudia zilizowahi kutolewa nchini, ni kati ya miaka 15 na wengine waliachiwa huru.

Lulu alifikishwa Mahakama ya Hakimu Mkazi Kisutu, Aprili 11, mwaka huu akikabiliwa na tuhuma za kumuua Kanumba Aprili 7, 2012.

Alikuwa akidaiwa kutenda kosa hilo kinyume na kifungu cha 196 cha Sheria ya Mwenendo wa Makosa ya Jinai (CPA), shtaka ambalo mshtakiwa anayepatikana na hatia adhabu yake ni kunyongwa hadi kufa.

Hata hivyo, jana upande wa mashtaka ulieleza mahakamani kuwa kwa sasa imebadilisha mashtaka kutoka kuua kwa kukusudia na kuwa kuua bila kukusudia, kinyume cha kifungu cha 195 cha CP.

Mshtakiwa huyo alitarajiwa kusomewa mashtaka hayo mapya jana pamoja na maelezo yote ya kesi, ambapo angesomewa ushahidi wa mashahidi wote pamoja na vielelezo muhimu katika kesi hiyo.

Hata hivyo, hatua hiyo ilikwama kutokana na Wakili wa Serikali Mwandamizi, Tumaini Kweka anayeiendesha kesi hiyo kutokuwapo mahakamani na badala yake aliwakilishwa na Wakili wa Serikali, Ofmedy Mtenga.

“Upelelezi wa shauri lako umeshakamilika na tungeweza kukusomea comital (maelezo ya kesi) leo, lakini kwa kuwa waendesha mashtaka hawapo basi tunaliahirisha mpaka tarehe nyingine.”, alisema Hakimu Mkazi Agustina Mmbando, anayesikiliza kesi hiyo katika hatua hiyo ya awali.

Taarifa hizo za kukamilika kwa ushahidi wa kesi hiyo zilipokewa kwa furaha na shangwe na msanii huyo, kiasi kwamba alishindwa kujizuia kuonyesha furaha yake.

Wakili wake Peter Kibatala aliiomba mahakama itoe ahirisho fupi hadi Ijumaa kwa ajili ya mshtakiwa kusomewa mashtaka haya mapya pamoja na maelezo ya awali.
Hakimu Mmbando alikubaliana na ombi hilo la Wakili Kibatala na akaahirisha kesi hiyo hadi Ijumaa.

Baada ya Mahakama ya Kisutu kukamilisha taratibu hizo kesi hiyo itahamishiwa Mahakama Kuu ambako ndiko itakaposikilizwa.

Lulu alipandishwa kizimbani mahakamani hapo kwa mara ya kwanza Aprili 11, 2012 na kusomewa shtaka moja la mauaji ya msanii mwenzake, Kanumba.

Kutoka Wizara ya Mambo ya Nje na Ushirikiano wa Kimataifa:Mafunzo ya OPRAS kwa Wakurugenzi na Maafisa wa Wizara yaanza

Kaimu Katibu Mkuu wa Wizara ya Mambo ya Nje na Ushirikiano, Mhe. Balozi Rajab Gamaha (aliyesimama) akifungua Mafunzo ya Upimaji wa Utendaji Kazi kwa Uwazi (OPRAS) kwa Wakurugenzi na Maafisa wa Wizara yaliyoendeshwa na Wakufunzi kutoka Ofisi ya Rais, Menejimenti ya Utumishi wa Umma. Wengine katika picha kutoka kushoto ni Bw. Dushhood Mndeme, Mkurugenzi wa Idara ya Utawala na Usimamizi wa Rasilimali Watu katika Wizara ya Mambo ya Nje, Bi. Neema, Mkufunzi kutoka Utumishi na Bi. Elizabeth Makyao kutoka Utumishi.

Bi. Neema kutoka Utumishi akisisitiza jambo kuhusu mafunzo hayo kwa Wakurugenzi na Maafisa wa Wizara (hawapo pichani) huku Balozi Gamaha akisikiliza.

Bi. Elizabeth kutoka Utumishi akiwasilisha mada kuhusu mfumo huo wa upimaji kazi kwa njia ya uwazi (OPRAS) kwa Wakurugenzi na Maafisa wa Wizara (hawapo pichani) huku Bal. Gamaha, Bw. Mndeme na Bi. Neema wakimsikiliza.

Baadhi ya Wakurugenzi na Wakuu wa Vitengo  na Maafisa kutoka Wizara ya Mambo ya Nje wakifuatilia mafunzo hayo.

Baadhi ya Wakuu wa Vitengo na Maafisa kutoka Wizara ya Mambo ya Nje walioshiriki mafunzo hayo.

Baadhi ya Maafisa kutoka Wizara ya Mambo ya Nje wakifuatilia kwa makini mafunzo hayo ya OPRAS.

Maafisa wengine wa Mambo ya Nje wakiendelea na mafunzo ya OPRAS.

Baadhi ya Wakurugenzi na Wakurugenzi Wasaidizi kutoka Wizara ya Mambo ya Nje na Ushirikiano wa Kimataifa wakifuatilia kwa makini mafunzo hayo.

Maafisa Waandamizi kutoka Wizara ya Mambo ya Nje wakiendelea na mafunzo ya OPRAS.

Sehemu nyingine ya Watendaji Wakuu kutoka Wizara ya Mambo ya Nje wakifuatilia mafunzo hayo.Picha Zote na Habari na Wizara ya Mambo ya Nje na Ushirikiano wa Kimataifa

Ndege ya kwanza yatua uwanja wa kimataifa wa Mbeya Songwe

HATIMAYE Ndege ya kwanza ya abiria imetua katika Uwanja wa kimataifa wa Songwe jana baada ya miaka 11 ya ujenzi wake ambao tayari umekamilika na kugharimu Sh100 bilioni.

Akizungumza baada ya kutua ndege hiyo, Kaimu Mkurugenzi wa Mamlaka ya Viwanja vya
Ndege Tanzania (TAA), Seleman Seleman alisema kuwa tayari uwanja wa kimataifa wa Songwe umekamilika na dunia nzima ina taarifa ya kukamilika kwa uwanja huo.

Alisema kuwa kutokana na kukamilika kwa uwanja huo, tayari ofisi za mamlaka hiyo imeshahamia katika uwanja huo na kuanza shughuli zake rasmi huku uwanja wa zamani ukifungwa rasmi na hakuna ndege yoyote itakayoweza kutua katika uwanja huo.

“Tumeanzisha historia mpya kwani dunia inafahamau kwa sasa kuna uwanja wa kimataiafa wa Songwe, upo wazi umekamilika na umeanza kutumika rasmi leo(jana),”alisema
Alisema kuwa uwanja wa Songwe wa kimataifa ni kati ya viwanja vikubwa viwili kujengwa baada ya uhuru ukitanguliwa na uwanja wa Mkoa wa Kilimanjaro kwani viwanja vingine vimekuwa vikifanyiwa marekebisho.

Kwa upande wake Kaimu Mkuu wa Mkoa wa Mbeya,Mkuu wa Wilaya ya Chunya, Deodatus Kinawiro alisema, aliwataka wananchi wa Mkoa wa Mbeya kujiandaa kutumia uwanja huo kwa kuongeza kipato chao na kuinua uchumi wa mkoa.

Alisema kuwa wakazi wa Mbeya wanapaswa kuzalisha kwa wingi maua na matunda kwa nia ya kuinua uchumi. wa mkoa huo na uweze kukua, “Tusiutumie uwanja huu kwa lengo la kusafiria pekee”alisema na kuongeza:

“Uwanja wa Songwe ni fursa muhimu kwa wakazi wa Mkoa wa Mbeya na mikoa jirani, kwani utaweza kuwasaidia katika kuongeza pato la mtu mmoja mmoja na taifa kwa ujumla kutokana na uwanja huo kuwa wa kimataifa ambapo shughuli mbali mbali za kiuchumi zitafanyika kutokana na uwanja huo,”alisema.

TCU Yaibana Kampala International University KIU

TUME ya Vyuo Vikuu Nchini (TCU) imeiagiza menejimenti ya Chuo Kikuu Kishiriki cha Chuo Kikuu cha Kimataifa cha Kampala (KIU) Dar es Salaam kuwasilisha sifa za wahadhiri wanaofundisha chuoni hapo kwa ajili ya kuwafanyia ukaguzi.

Agizo hilo la TCU limekuja baada ya wanafunzi kuhoji sifa za baadhi ya wahadhiri wanaowafundisha, wakati walipokuwa kwenye mgomo wa kutoingia madarasani wakitaka kusikilizwa kwa matatizo mbalimbali likiwamo la sifa za wahadhiri.

Katika taarifa iliyotolewa kwa umma na Katibu Mtendaji wa TCU, Profesa Sifuni Mchome, orodha hiyo ya wahadhiri inatakiwa iandaliwe kwa kushirikisha viongozi wa wanafunzi na Kitengo cha Udhibiti wa Ubora cha Chuo (KIU Quality Assurance Unit).

Profesa Mchome ametaka orodha hiyo iambatane na nakala za vyeti vya wahadhiri wote wanaofundisha katika chuo kikuu hicho na kuwasilishwa TCU kabla ya Desemba 31 mwaka huu.

Hoja hiyo ya wanafunzi kuhoji ubora wa walimu wao ni moja ya matatizo mengine 22 waliyoyalalamikia na kusababisha kufunga barabara ya Pugu mwanzoni mwa wiki hii, wakishinikiza matatizo hayo kupatiwa mwafaka.

Katika matatizo hayo yaliyowafanya wagome kuingia madarasani, wanafunzi pia walitoa malalamiko kuhusu utoshelevu finyu wa mafunzo wanayopata katika masomo ya shahada za udaktari wa binadamu na uhandisi.

Katika tatizo hilo, TCU imeahidi kuunda timu ya wataalamu itakayoshirikisha wataalamu wa kutoka Chama cha Madaktari Tanzania (Mat) na Bodi ya Usajili wa Wahandisi (ERB) ili kufanya uchunguzi wa kina kuhusu malalamiko yaliyojitokeza na kutoa mapendekezo yake.

“Zoezi hili linatakiwa likamilike ifikapo Januari 15 mwakani na hatua stahiki zianze kuchukuliwa baada ya hapo’’ alisema Prof. Mchome katika taarifa aliyoitoa juzi.
“Sambamba na hili, Tume inaandaa utaratibu wa kufanya tathmini ya masuala mbalimbali katika chuo hiki ili kujiridhisha kama masuala mbalimbali yanatekelezwa kwa mujibu wa sheria,” aliongeza Profesa Mchome.

Kuhusu wanafunzi kulazimishwa kwenda kufanyia mahafali nchini Uganda na kugharamikia kiasi cha Sh300,000 kwa ajili ya kushiriki mahafali hayo, Profesa Mchome alisema chuo hicho kimeelekezwa kuanza kufanya mahafali yake hapa nchi kuanzia mwakani.

Aidha alisema kuwa mwanafunzi ana haki ya kupatiwa Cheti, Stashahada au Shahada endapo amehitimu na kufaulu masomo yake na halazimiki kushiriki katika mahafali.

Kawambwa: Waliosoma vyuo vikuu na pesa za mikopo warudishe haraka

 SERIKALI imewataka wote waliokopeshwa kwa ajili ya kusoma elimu ya juu nchini kuirejesha kwa hiari  mikopo hiyo kwa Bodi ya Mikopo ya Wanafunzi wa Elimu ya Juu (HELSB) na wasipofanya hivyo watafuatiliwa na wakala maalumu aliyeajiriwa na bodi hiyo kwa ajili ya kuwafuatilia ambao hawajairejesha mpaka sasa.

Imesema mpaka kufika Septemba mwaka huu fedha zilizokusanywa ni Sh23.3 bilioni kutoka kwa watu 48,235 na kwamba kiwango hicho ni chini ya asilimia 50 ya fedha zilizotakiwa kurudishwa, chini ya asilimia 50 ya watu wanaotakiwa kurejesha mikopo hiyo.

Akizungumza katika kipindi cha dakika 45 kinachorushwa na Televisheni ya ITV, Waziri wa Elimu na Mafunzo ya Ufundi , Dk Shukuru Kawambwa alisema suala la urejeshwaji wa mikopo bado ni changamoto kubwa.

“Hawa 48,235 ni wale ambao bodi imewagundua wako wapi na wanafanya kazi gani, wengine hawajagundulika wako wapi  hata hawajitokezi sijui  wanataka mpaka watafutwe,” alisema Kawambwa na kuongeza:
“Bodi imeajiri  wakala maalumu kwa ajili ya kuwafuatilia watu ambao hawajarejesha mikopo, lengo ni kuhakikisha fedha hizi zinakusanywa ili kuwasaidia wanafunzi wengine.

“Nimeiambia bodi kuwa, hatuwezi kuzungumza vizuri kabla ya kufanya kazi nzuri ya kurejesha mikopo, nimewaeleza wazi kwamba hawawezi  kutoa mikopo wakati hawairejeshi ipasavyo, sasa hakuna kulala ni kazi tu,” alisema Kawambwa.

Alifafanua, “Kama waliotakiwa kurejesha mikopo  wangefanya hivyo kwa wakati ni wazi kuwa  idadi ya wanafunzi watakaopata mikopo ingeongezeka kwa kiasi kikubwa, lengo la Serikali ya awamu ya nne ni kuona kila mwanafunzi anapata mkopo.”

Alisema mwaka 2004-2005 wanafunzi 6,000 tu ndiyo waliopewa mikopo na  kwamba mwaka huu idadi hiyo imeongezeka hadi kufikia wanafunzi 98,000.
Alifafanua Mwaka 2004 -2005 fedha iliyotolewa kwa ajili ya mikopo ni Sh9.9 bilioni na kwamba  bajeti ya mwaka huu ni Sh326 bilioni.

Akizungumzia wanafunzi wanaostahili kupewa mikopo, Dk Kawambwa alisema kila mwaka taratibu za mikopo zinafanyiwa marekebisho ili ziwe na manufaa zaidi na kwamba hilo limetokana na ushauri mbalimbali kutoka kwa wadau wa elimu nchini.

“Kwanza huwa wanatizamwa wanafunzi waliofanya vizuri katika mitihani yao kwa kuwa Serikali ya Tanzania imeamua kuwekeza kwa wanafunzi waliofaulu vizuri zaidi,” alisema Kawamba na kuongeza:
“Lakini baada ya kusikiliza ushauri tulianza kutizama uhitaji zaidi, sasa tunaangalia anayeomba mkopo anahitaji kweli kupewa, pia tunatizama vipaumbele tulivyojiwekea ambavyo ni wanafunzi wanaosomea udaktari, ualimu na uhandisi.”
Alisema kutokana na hali hiyo mwaka huu asilimia 50 ya wanafunzi walioomba mikopo ni walimu.

“Walimu kujiendelea kielimu ni jambo zuri lakini sio kukimbia kufundisha kwa lengo la kusoma, tumewaruhusu baadhi ya walimu kusoma na wengine tutawaruhusu mwakani” alisema Kawambwa.

Akizungumzia suala la wanafunzi kufanyiwa udahili mara mbili, alisema Tume ya Vyuo Vikuu (TCU) imeanzisha mpango wa awamu ya pili ya kudahili wanafunzi unaoitwa, Mpango wa Pamoja wa Kudahili Wanafunzi (CAS) na kwamba  umetengenezwa kwa teknolojia ya hali ya juu.

“Wanafunzi walioomba nafasi  sasa wanaingizwa  katika mfumo huo na kuchambuliwa kulingana na sifa zao hakuna atakayependelewa, kila mwenye sifa atapangiwa fani atatakayosoma” alisema Kawambwa na kuongeza: